Vivucha

Kay Huamanga llaqtapis yachasqa huk siñura, chullalla taksa wawachayuq. Chay wawachansi kasqa qaricha. Iskuylaman kachaptinsi manariqchu hinaspansi Arku pampata lluptikuspan jibi warakawan wallpakunata wañuchispan mamanman apaq, hinaptinsi maman chaskiq vivucha kaspanmi wawyqa apamuwan nispansi chaskiq.

Chaymantaqa, qullqita, alajakunata, sirana makinakunata, tukuy imatas apaq: manas mamanqa tapuqchumaymantam apamunki kaykunata, pim qumusunki, imawanmi rantimunki nispapas. Wawanqa tarikamunim nispas niq mamanta, hinaptinsi vivucha kayninwanmi wawayqa kaykuna mamanta kuyaspan apamun nispallansi niq. Watapa risqanpis vivuchaqa pumawanqa nisqan hatun chirinan urqumanña ripun, chaypis sapallan hatu hatum chaypi yachan hinaspas llapa puriqkunata suwaspan apamuq mamanman, mamanqa chaskuyllas chaskin mana imata nispa.

Chaynalla kasqa pumaqawanqapi, chaypis runakunata wañurachispan kunkanta kuchuruq hinaspansi llapa wañuchisqanpa asnunkunata, mulankunata, kaballunkunata kunkanta kuchuq hinaspas runapa qunpinman asnupa umanta siraruq; asnupa qunpinmanchataqsi runapa umanta siraruq hinaspansi asiywan wañuq. Chaynalla llapa runata wañuchikaptinsi chay ñannin puriqkuna puraminti wañuyta mamchakuspanku.

Aqa iskay chunka runas kay Huamanga llaqtaman chayaramun hinaspas prifiktupata pasanku. Prifiktus achka suldaduta quykun. Chay suldadukuhamuq runakunaqa kutinku hinaspankus vivuchataqa hapirunku.

Hapiruspankus alli allin chaqnasqata pusamunku chakintawan. Chayarachimuspankus prifikturaman apanku, hinaptinsi profiktuqa paqarinmi kay Huamanga llaqtapa hatun plasapi warkusqa wañunqa nispas watay wasiman wichqaykachin. Achikyaruptinsi suldadukunaqa watay wasimanta urquykamuspanku hatun plasapa muyusiqninta muyuchinku makins watasqata. Prifiktura punkupis waskaqa warkurayachkan chaypi warkunankupaq. Chayman chayaruspas vivuchaqa ñawin watasqa latapata urquykuspa nin: mamakuna, panikuna, waqikuna, uña wawakuna, uyariqniy llapa runakuna, kananmi manaraq tiqusqa huchaymanta wañuchkaspay kaykunata nuykusaykichik!, nispansi qarinchaykuspan wiqita waqaykuspa llapa qawaqninta nin: uchuychallaraq kaspay, mamay iskuylaman churawaptinmi mana riqchu kani, hinaspaymi wallpata, qullqita, tukuy imata apaq kani, inaptinmi mamay mana imatapas niwaqchu, vivucha kaspam apamuwan nispan chaskiwaq. Chaymantam pumaqawanqamanña ripuspay tukuy imata apamuq kani, chaypipas manan imatapas niwaqchu!

Mamakuna, amam wawaykichikta chayna ñuqahina ruwaqta hatallinkichikchu. Mayman tukuy imata suwakuspay apaptiymi chaskiylla chaskiwaq mana imata niwaspan, wawaykichik imatapas apamusuptikichikmi kutirichinkichikpuni, amam imatapas tarikaramunim nispa apamusuptikichik chaskichikchu, mana chuyqa ñuqahinam kanmankum suwa, runa wañuchiq; mamypa kawsanpim kanan warkusqa wañusaq nispansi kunkaman anillusqa waskata ustuykachispa llapan runapa qayllanpi warkukuykun. Qallunpas pawasqasvivuchallaqa wañurun. Kay willakuymi llapa mamapa uyarinanpaq. Mana allinta uyariptinqa wawankum kanman vivuchahina. Allinta uywaychik wawykichikta mamakuna.

Autor ayacuchano